দুলৗড় সৗগৗই
---রমেশ বেসরা
ধৗরতিরে যতখন দামান মারাং সৗগৗই অকা ?
যাহাদ হামাল ঝৗলতে বাং গানঃ লেখা-যখা ৷
অনাদ পে আখরতে বেনাও রৗড় ঞুতুম দুলৗড়,
অৗড়ৗরে সানাম সৗগৗই হেনাঃ খৗড় অৗডি তুখৗড় ৷
গিদরৗঠেন অৗয়ুবাবা দুলৗড় সেরমাখনহঁ মারাং,
সোহাগ চঃ চেরেচ নিরৗট দুলৗড় বৗনুঃ খারাং ৷
কাডাবাড়াঃ চাচডিডি তাড়াম থালাঃথুলুঃ চেরেচ,
সামাং হড় লৗবিৎ জহা চকজ লৗগিৎক রেপেজ৷
মিৎতে অলঃ খেলোড গাতেকোয়াঃ সুলুক সৗগৗই,
মাচেৎআঃ সিকনৗৎ দুলৗড় জিয়ন ডাহারে নিরৗই ৷
জুয়ৗন বেড়ারে উকুদানাং সৗগৗই তপল দুপলৗড়,
স-সঁধাড় গুলৗচ বাহালেকা অৗডি চরক চিকৗড় ৷
তিরে-তি সাপাপকাতে তলঃ সৗগুন বাপ্লা গিরৗ,
ঘাঁরঞ্জরে সুলুক-এ সারসাও জুরি দুলৗড় কিরৗ ৷
তিনরে বাপ্লা ইতৗখনে জানামঃ হপন-হপনএরা,
বাখোল মার্শাল-আর্শালঃ অৗড়তিঃ দুলৗড় চেহরা ৷
সুখ-দুখরে হর-বিররে পাতাওঅঃ অৗনৗড়ি পৗতয়ৗও,
হড়তে রড় হড়খানগে পেড়া দুলৗড়বন অৗয়কৗও ৷
হাড়ামবুডহি লৗঠি তিরুব সিবিল গড়ম সড়ম দুলৗড়,
মুচৗৎ ধৗবিজ নাপায়ে দহবন তিনৗঃদিন বাবন দৗড় ৷
0 Comments